ल्यापटप सफा गर्दा ध्यान दिनुस्

कम्प्युटर र ल्यापटप। दैनिक कामका यी साधन जसरी प्रयोग भइरहेका हुन्छन् त्यसरी नै फोहर पनि। काठमाडौंको धुलो र धुँवाको वातावरणमा त हावा पुग्ने जति ठाउँमा राखेका सबै चिजको सतहमा धुलो जमेको हुन्छ। कम्प्युटरको किबोर्ड र स्क्रिनको त कुरै छोडौं सीपीयूको कुनै पनि त्यस्तो भाग हुँदैन जहाँ धुलो नबसेको होस्। त्यसो त लामो समय सम्म सफा नगर्ने हो भने कम्प्युटरको सीपीयूको भित्री भागमा जालो समेत लागिसकेको हुन्छ। अध्ययनले मोबाइल फोन शौचालय भन्दा बढि फोहर हुन्छ भन्ने देखाइसकेको छ। कम्प्युटर र ल्यापटप त मोबाइल भन्दा पनि धेरै फोहर हुन्छन्। साइबर क्याफे र कार्यालयको कम्प्युटर त धेरै फरक फरक मानिसहरुले चलाउँदा फोहर मात्र होइन संक्रमण र रोगको घर नै बन्दछन्। स्वास्थ्यका दृष्टिले मानिसलाई मात्र खराब गर्ने होइन कम्प्युटरमा छिर्ने धूलो र फोहरले कम्प्युटरलाई पनि खराब गरिरहेको हुन्छ। धेरै फोहर जम्मा भएको खण्डमा कम्प्युटरमा पनि विभिन्न गडबडी देखिन थाल्दछ। यदी कम्प्युटर तथा ल्यापटप लामो समय सम्म चलोस् अनि राम्रोसँग काम गरोस् भन्ने चाहनुहुन्छ भने त्यसमा जम्मा हुने फोहर पनि समय समयमा सफा गरिरहनुपर्छ। कम्प्युटर तथा ल्यापटपको सफाइ गर्नु जति जरुरी छ त्यसका उपकरण र भागहरुको संवेदनशिलतालाई बुझ्नु पनि जरुरी छ। नत्र यस्तो नहोस् कि कम्प्युटर सफाइ गर्दा नै त्यसमा क्षती पुगेर काम नलाग्ने होस्। त्यसैले कम्प्युटर तथा ल्यापटपको सफाइ गर्दा यस्ता कुरामा ध्यान दिनुहोस्

• कम्प्युटर तथा ल्यापटपको सफाइ गर्दा जहिले पनि त्यसलाई बन्द राख्नुहोस्। जसले गर्दा कुनै कि वा बटन थिचिएर कम्प्युटरमा गलत आदेश नजाओस्।
• कम्प्युटर तथा ल्यापटप सफा गर्दा प्लास्टिकको सुख्खा चप्पल लगाउन वा म्याटमा टेक्न नभुल्नुहोस्। ताकी करेन्ट नलागोस्। सबै भन्दा राम्रो उपाय चाहिँ सबै खालका कम्प्युटरका पावर प्लगलाई घरको स्वीचबक्स वा पावर प्लगबाट झिक्नु हुन्छ।
• कम्प्युटरको स्क्रीनको सफाइ गर्दा कमलो कपडा प्रयोग गर्नुहोस्। कटनको कपडाले सफा गरेको खण्डमा त्यसमा रेसा बस्दैन भने स्क्रीन कोरिने समस्या पनि आउँदैन।
• कम्प्युटर सफा गर्न प्रयोग गरेको कपडा चिसो हुनुहुँदैन। पानी वा तेलको चिसोपन रहेको खण्डमा त्यसले थप दाग, धब्बा पैदा गर्छ।
• कम्प्युटरको भित्री भाग अर्थात् सीपीयू भित्र सफाइ गर्नका लागि हावा फाल्ने (ब्लोअर) वा कमलो ब्रसको प्रयोग गर्न सकिन्छ। ब्लोअर छैन भने हेयर ड्रायर पनि प्रयोग गर्न सकिन्छ। ड्रायर प्रयोग गर्दा लगातार धेरै समय भने गर्न हुँदैन।
• माउस सफा गर्नका लागि भने माउसलाई सफा कागज माथि राख्नुहोस्। यसरी राखेपछि केही क्षण दायाँ बायाँ गर्दा माउसको तल्लो भागमा जम्मा भएको फोहर कागजमा खस्छ