टेलिकमको थ्रीजी सेवामा चमत्कारिक सुधार

२२ साउन, काठमाडौं । राजधानीमा नेपाल टेलिकमको जिएसएम थ्रीजी इन्टरनेट सेवामा चमत्कारिक सुधार आएको छ । टेलिकमले थ्रीजीका पुराना बिटिएस परिवर्तन गरी त्यसका ठाउँमा नयाँ बिटिएस प्रतिस्थापन गरेपछि थ्रीजी सेवामा चमत्कारिक सुधार आएको हो । अहिले बिटिएस प्रतिस्थापन गरेका स्थानहरुमा थ्रीजी इन्टरनेट सेवा निकै छिटो चल्न थालेको छ ।

गुणस्तरिय सेवा दिन नसकेर सधै आलोचना खेप्दै आएको टेलिकमले पछिल्लो समय सेवा सुधारलाई पहिलो प्राथमिकतामा राखेको छ । राजधानीमा २ सय ६५ बिटिएस परिवर्तन गर्ने कार्यक्रम रहेको टेलिकमकी प्रवक्ता गुणकेशरी प्रधानले बताउनुभयो । करिव २ हप्ता अगाडीदेखि बिटिएस परिवर्तन गर्न थालेको टेलिकमले अहिलेसम्म विभिन्न स्थानमा ७० वटा परिवर्तन गरिसकेको उहाँको भनाई छ । कीर्तिपुरबाट बिटिएस परिवर्तन गर्न सुरु गरेको टेकिमले पाटन, स्विचाटार, कोटेश्वर, कुमारीपाटी, सानेपा, नक्साल, बानेश्वर लगाएतका ठाउँमा बिटिएस परिवर्तन गरिसकेको छ ।

बिटिएस परिवर्तन गर्ने काम सकिएपछि राजधानीमा थ्रीजी सेवामा ठूलो सुधार आउने टेलिकमका इञ्जिनियर निर्मल घिमिरले बताउनुभयो । अत्यन्त न्यून गतिमा सञ्चालन भइरहेको थ्रीजी इन्टरनेट सेवा बिटिएस परिवर्तन गरेपछि ८ एमबिपिएसको उच्च गतिसम्म चल्न सक्ने टेलिकमको दाबि छ । टेलिकमले राजधानीमा बिटिएस फेर्ने कास सिध्याएपछि पोखरामा सुरु गर्ने बताएको छ ।

मोबाइलमा थ्रीजी इन्टरनेट उच्च गतिमा चल्न थालेपछि राजधानीबासी दङ्ग पर्न थालेका छन् ।